అమెరికాతో చర్చలకు ఇరాన్ షరతులు.. ఒక్క గ్రాము యురేనియం ఇచ్చేది లేదంటూ స్పష్టీకరణ

అమెరికాతో చర్చల విషయంలో ఇరాన్ తన వైఖరిని మరింత కఠినతరం చేసింది. తమ దేశంలో శుద్ధి చేసిన యురేనియంను ఒక్క గ్రాము కూడా విదేశాలకు పంపే ప్రసక్తే లేదని తేల్చిచెప్పింది. ఇది తమ జాతీయ సంపదని, దీనిపై దేశ ప్రజలకే సర్వహక్కులు ఉంటాయని స్పష్టం చేసింది. అంతేకాకుండా, అమెరికాతో చర్చల పునరుద్ధరణకు పలు కీలక షరతులను ఇరాన్ తెరపైకి తెచ్చింది.

మంగళవారం టెహ్రాన్‌లో పర్యటించిన పాకిస్థాన్ ఆర్మీ చీఫ్ జనరల్ ఆసిమ్ మునీర్‌తో భేటీ సందర్భంగా ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి మొహ్సెన్ రెజాయీ ఈ వ్యాఖ్యలు చేశారు. శుద్ధి చేసిన అణు పదార్థాలను కేవలం స్వదేశీ అవసరాల కోసమే వినియోగిస్తామని, వాటిని దేశం దాటించే ప్రసక్తే లేదని ఆయన స్పష్టం చేశారు.

మరోవైపు, ఇరాన్ అధ్యక్షుడు మసూద్ పెజెష్కియాన్ సైతం ఇదే రీతిలో స్పందించారు. బెదిరింపుల మధ్య చర్చలు సాధ్యం కావని ఆయన కుండబద్దలు కొట్టారు. చర్చలకు ఉపక్రమించే ముందే అమెరికా తమపై విధించిన ఆంక్షలను పూర్తిగా ఎత్తివేయాలని, సైనికపరమైన బెదిరింపులకు స్వస్తి పలకాలని ఆయన డిమాండ్ చేశారు.

ఇక ఇరాన్ పార్లమెంట్ స్పీకర్ మహమ్మద్ బాఘేర్ ఘలీబాఫ్ మాట్లాడుతూ.. చర్చలకు సంబంధించి అమెరికా తమ ఏడు షరతులను నెరవేర్చాలని స్పష్టం చేశారు. పశ్చిమాసియా వ్యాప్తంగా కాల్పుల విరమణ, విదేశాల్లో స్తంభింపజేసిన ఇరాన్ ఆస్తుల విడుదల, చమురు రంగంపై ఆంక్షల తొలగింపు వంటివి ఈ షరతుల్లో ప్రధానమైనవని ఆయన వెల్లడించారు. మొత్తానికి అణు కార్యక్రమం, ఆర్థిక ఆంక్షల విషయంలో అమెరికా ముందు స్పష్టమైన డిమాండ్లను ఉంచడం ద్వారా, చర్చల విషయంలో తన దృఢ నిశ్చయాన్ని ఇరాన్ చాటిచెప్పింది.